رحلة العذاب

أقلعنا من جدة الساعة 4 العصر والصراحة زي كل المرة كانت الطيارة تطلع اصوات كانها عربية كارو قديمة وطول الرحلة وانا اقول يارب ما ينفك الباب حق الطيارة ونطير في الهوا(تخيل اخي القارئ اختي المتابعة المنظر)المهم الحمدلله وصلنا بالسلامة,بس في نقطة احب اوضحها انو عندي قناعة شخصية انو الشي اللي بيحفظ طيارات السعودية من الوقوع والحوادث هو انهم بيقرئوا دعاء السفر في كل رحلة.نرجع لموضوعنا وصلت للرياض وكان في استقبالي صاحبي اللي اخدني على وزارة التعليم العالي على طول حيث اني رايح للرياض علشان اخلص موضوعي في الوزارة بعد ماجاتني الفيزا,طبعا الجو في الرياض مايحتاج كأنك واقف على شباك مفتوح على جهنم (يالطيف)ومافي اي امل تعيش بدون مكيف هناك

وصلت للوزارة ولقيت الدنيا مقفلة وانا اللي رايح على اساس انهم كانوا يداوموا من5-10 علشان موضوع البعثات لكن السيكيوريتي قالي انهم مابيداموا الا في الصباح فمالي الا انوا ابات واجي من بكرة الصباح واخلص اموري

رجعت مع صاحبي  لبيتو واتصلت على الحجز علشان اأجل الحجز لتاني يوم(الثلاثاء)رد عليا الموظف بعد فترة انتظار وقالي انو مافي امكانية لبكرة وانو اقرب رحلة حتكون يوم الجمعة وانتظار!!!!!!والله تعرفها

اقعد في الرياض الين الجمعة لييييييييييييه؟ المهم في قاعدة اتعلمتها من معارفي في الخطوط انو اذا تبغى احد يساعدك في حجز جيب اي حجز ان شاء الله انتظار وبعد كده تتدبر بس المهم يكون فيه حجز فماضيعت الفرصة وقلتلو :طيب غيرلي حجزي لانتظار يوم الجمعة

قفلت من هنا واتصلت على واحد اعرفو في الخطوط واترجيتوا يطلعني من الورطة دي ووعدني خير

طبعا قضيت الليلة دي في الرياض باني قابلت اعز اصحابي اللي انتقل للسكن في الرياض من فترة لظروف وظيفتو

طبعا قالي لازم افرجك على الرياض وشوارعها وابرز معالمها

بدأنا بشارع التحلية حقهم

الصراحة مرتب وتحس انك في بلد اجنبي من حيث نضافة الشارع وترتيب المحلات

بس الجو مررررررررررة مايساعد حتى انك تتخيل انك برة السعودية

وبعدين فرجني على المملكة والفيصلية من قريب

وراني عينة من بنات الرياض اللي يرتادوا المملكة والفيصلية وقالي حتشوف شي ماشفناه في جدة

وبالفعل بنات اخر روقان

ولا كانهم في الرياض ولا كانو اللي نسمعو عن هيئة الرياض يهمهم في شئ

ماعلينا

وبعدين قلي لازم تشرب قهوة من د.كيف وكنت سمعت عنها كتير

طلبنا كراميل فرابشينو والصراحة كان جيد واللي عجبنيفي د.كيف انو الموظفين كلهم سعوديين

بعد كده رجعت اتعشيت مع صاحبي اللي استقبلني وكنا طلبنا دومينوز بيتزا

نمت وصحيت تاني يوم وعلى الوزارة عدل

كان عندي تصور اني رايح واموري كلها كاملة واوراقي جاهزة

وصلت هناك وحست الين وصلت للموظف المسئول

اخذت رقم وانتظرت

اغلب الموجودين هنا جايين يستفسروا عن شي او موضوع معين بما انو المرحلة الاولى من البعثات خلصت وبدات المرحلة التانية

المهم انتظرت الين جا دوري وتقدمت للموظف المسئول

قلتله: لو سمحت انا مقدم على البعثة في المرحلة الاولى واوراقي كلها جاهزة وعندي الفيزا

قلي: هات صورة الفيزا والجواز والبطاقة والشهادة والترانس(كشف الدرجات)واصل شهادة الجامعة

اديتو كل اللي طلبوا

اعطاني ورقة وقالي عبيها وارجعلي

عبيت الورقة وكانت كلها تعهدات وتواقيع

خلصتها ورجعتلو

سلمتو الاوراق طالع فيها واتاكد منها ودبسها ورماها قدامو وقالي:راجعنا السبت

سألتوا: طيب ممكن اعرف ايش الاجراء اللي راح يصير؟ وليش مفروض اراجع السبت؟

قلي: ما اعرف راجعنا السبت وانت تعرف

قلتلو: يا اخي انا جي من جدة اذا تقدر تساعدني واذا كان في امكانية تخلصلي هي اليوم اكون شاكرلك

قالي(بعد مانظرلي شزرا):اذا تبغى اوراقك خدها

مافهمت قصدو

قلتلوا يا اخي انا جاي من جدة و

قاطعني: يعني جدة برة السعودية؟فاجأني بالهجوم الارتدادي

انا هنا اتنرفزت بس حاولت قد ما اقدر امسك اعصابي

اخذت اوراقي وحاولت اجري اتصالاتي بالناس اللي اعرفهم وممكن يفيدوني في الوزارة

كلهم كانوا بيقولوا: الوزارة بدأت مرحلة جديدة واللي قدم في المرحلة الاولى وماخلص لازم يقدم من اول جديد

يا سلام!!!!طيب واللي اتمرمط الين جاب الفيزا وخلص اموره هل لازم يقدم من اول وجديد؟؟؟

الاجابة الصاعقة: نعم

ابو التحطيم يا ناس

طلعت لوكيل الوزارة

قابلني مدير مكتبو وكان انسان جدا محترم وقمة في الرقي

شرحتلو وضعي وسمع مني الين خلصت وبعدين رد عليا وقال: يا ابني مو انت لحالك اللي نفس الوضع في زيك كتير بس احنا بنحاول نحل موضوعكم ذا خلال اسبوع وان شاء الله بينحل بس انا اقلك قدم على المرحلة التانية علشان تضمن نفسك اذا لاسمح الله ماقدرنا نحل مشكلتكم وطلبنا انكم تقدموا من اول وجديد تكون انت اخذت رقم واذا جاتك الموافقة مننا هنا تكون لك الاولوية وامورك رح تمشي باذن الله

خرجت من عندو انا تايه

طيب يعني الوظيفة ومازبطت والامل كلو كان محطوط على البعثة

قلت يمكن خيرة اموري اتيسرت هنا واتكلكعت في الوظيفة

لكن ماتعرف الخير فين

قلت في نفسي مدامك وصلت هنا وطلبوا اصل الشهادة ووقعوك على ورقة التعهدات فيمكن سبحان الله تمشي

جرب

رجعت للموظف الغلس واديتوا اوراقي وقلتلو: طيب انا رح ارجع جدة هل لازم اجي بنفسي يوم السبت ولا ممكن اسأل عليها بالتلفون.؟

قال: تقدر تسال عليها بالتلفون

شكرا

مشيت من الوزارة حوالي الساعة 1.30 الضهر ورجعت لبيت صاحبي ريحت شوية وصليت  واتصلت على صاحبنا اللي في الخطوط

قالي باحاولك على رحلة الليل بس ايش رايك تطلع دحين المطار وتحاول في الرحلات الجاية انك تطلع انتظار لانهم دايما بيسوا كده

قلتي امري لله اذا الواحد يبغى يرجع لجدة لازم يتحمل شوية مصاعب

طلعت المطار ووصلت على الساعة2.30 ورحت للكاونتر حق الانتظار

ياللللهووووووي على المنظر

يمكن 600واحد قدامي صافين سرى يبغوا يسجلوا انتظار

وطبعا نحن شعب نظامي لابعد الحدود لدرجة اننا من كتر ما احنا نظاميين مانطبقوا

كالعادة لاسرايا ولا سراك وكل من ايدو الو

المهم شوية موظف الحجز وقف وزعق باعلى صوتو: اللي يبغى يسجل انتظار جدة يجي على اليمين

طبعا هو قال كده والبشر اتلخبطوا على بعض

اللي كان في الاول اتحدف في الاخير واللي دوبو جاي لقى نفسو اول واحد بس مشي حالك المهم نطلع من القرف دا

وقفت في الطابور وجا دوري وسجلت اسمي

كان رقمي 127

الكلام دا كان الساعة 3

قالولنا في رحلة الساعة4 يمكن عليها امكانية

عدت4 وماصار شي

قالوا تاني في رحلة الساعة5

وعدت 5 وبرضو مافي شي

6

انا قلت بس يابويا نفس الكلام بيعيدوا من كم ساعة 

كلمني صاحبي وقالي انا دحين خارج من الدوام تبغاني امر عليك؟ قلتلوا طيب منها اريح شوية واتفرج مباراة البرازيل وغانا(ودا وقتك)ا

طبعا في مثل هادي المواقف تتعرف على ناس ابطال يفزعولك

وفي خضم هادي المعركة كنت اتعرفت على شب لطيف من جدة ونفس حالتي

طلبت منو انو اذا صار شي او اعلنوا عن رحلة اضافية يكلمني علشان اجي لانو قاعد في المطار وحينتظر

والله الراجل ماقصر اخذ رقمي ووعدني انو يتصل اذا صار شي

دوبني ركبت مع صاحبي وراجعين البيت واحنا في نص الطريق اتصل الشب البطل

قالي انهم اعلنوا عن رحلة اضافية الان وحيبدئوا يدوا البوردنج بعد شوية

طبعا انا ماصدقت خبر خليت صاحبي ينزلني واخذت ليموزين وطيران على المطار

دوبني داخل الصالة الا اسمع الموظف بينادي: الارقام من 120-130

انا زعقت بكل قوة: انا هنا 127 يا كلالالالالالالاب

طبعا يا كلاب دي كانت في سري

سبحت وسط ارتال من البشر والشنط الين وصلت قريب من المرسى واديتوا التذكرة ورجعلي هيا مرفقة بالبوردنج

طبعا سباحة عكس التيار للوصول الى شط الامان

افففففففففف الحمدلله خلصنا وان شاء الله شوية ونكون في جدة

الرحلة حتقلع الساعة 8 ودحين 6.30

يالله ادخل انتظر جوه

دخلت يا احباب وجلست انتظر موعد الاعلان عن صعود الطيارة

المفروض وقت الصعود 7.15

صارت 7.15

7.30

7.45

ياهووه مافي شي

اسمع همهمات وكلام يتداول بين الركاب عن تاخير الرحلة

بس قلت يمكن فتاوي كالعادة

صارت الساعة 8.30 ودوبو الاخ يعلن عن تاخر الرحلة الى 11.30

ايييييييييييييييييييييييي

الالم والاحباط

طبعا في موقف زي كده مالك الا حل واحد:

تقول حسبي الله ونعم الوكيل وتتوسد شنطتك وتاخدلك تعسيلة

اصعب شي الانتظار

احلى شي لمن تجلس زي كده فاضي وخاصة اذا ماكنت مستعد للشي دا فمالك الا انك تتفرج على اشكال الناس في المطار وتجلس تحلل وتفلسف مع نفسك

جا وقت الرحلة وما اعلنوا شي

شفت الشب البطل اللي اتصل عليا فرحت سلمت عليه وشكرتو وقعدت معاه شوية الين شفنا زحمة عند البوابة اللي المفروض نطلع منها

قلنا اكيد بدئوا يطلعوا على الطيارة

طيب اعلنوا يا اولاد الذين

طلعنا للطيارة وانا خلالالالالالالاص مهلوك ونفسي بس في شي واحد

دش ساخن وعلى السرير عدل

قعدنا في مقاعدنا وطبعا هنا ماعندك المجال انك تتدلع وتقول: والله انا ابغى اجلس جنب الشباك او الممر

هنا اذا قالولك تجلس في عب الطيار قول حاااااااضر وتحت امركم

صارت الساعة11.30

11.45

12

12.15

والطيارة زي ماهي ما اتحركت ومحد اعلن عن شي

طيب ايش اللي حصل؟حنسافر ولا لأ؟

شوية جا واحد من المضيفين وبس مر من جهتنا

استلمو واحد من الركاب

ياخي مايصير كده ماتقولولنا ايش اللي بيصير

حنطير ولا لأ؟

المهم المضيف طبعا ما قدر يرد حتى ما ادولوا فرصة للرد

شوية اتنين من الركاب قاموا من اماكنهم يتكلموا ويزعقوا

احلى شي واحد منهم شكلوا كان نايم وصحي لقى نفسو انو لسه في نفس المكان قام اخد شنطو ونزل من الطيارة

حركة

اعلن الطيار عن وجود خلل فني  والاقلاع سيكون بعد قليل

اقلعنا الساعة1

وصلنل الى جدة الساعة 2.30

على البيت على طووووووووووول

طبعا من قوة التعب ما استنيت اني افصخ ملابسي نمت وبعدين فصختها وانا نايم 🙂

المشكلة انو كان عندي دوام تاني يوم ولازم اقوم الساعة7.30

لكن الكويس انو كان يوم اربعاء

لكن ما أقول غير الحمدلله على كل حال

وكانت رحلة مليئة بالمتاعب والاحباط

بس الله كريم

اسف على الاطالة بس كانت تجربة لابد من تدوينها

Advertisements

2 thoughts on “رحلة العذاب

  1. يالطيييييييف والله أزمة
    الله يسهلك أمورك و يسهلك كل أمر عسير، قول آمين

    ما قلتلك أسحبها سيارة ولا نقل جماعي كان وصلت قبل الطيارة، هيهي

    بس عجبني إلي نزل من الطيارة، على باله راكب ليموزين ولا نقل

  2. الحين أبي أسألك ,, كل شوي جو الرياض و جو الرياض … ما قلت لنا عاد يوم رجعت جدة وش أخبار الأمطار ؟؟ يقولون درجة الحرارة في جدة في الصيف 12 و في الشتاء 5 تحت الصفر
    خخخخخخ و الله حاله ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s