خبر عاجل

أخواني اخواتي اللي كانوا متابعين موضوع الوظيفة والبعثة معايا من الاول

أحب بس أحطكم في الصورة واديكم آخر المستجدات:

بالنسبة لوظيفة صافولا فأبشركم…..خلاص بح مافي وظيفة في صافولا لانو الشركة شكلها بدأت تستهبل وآخرتها حتصير زي بيشة الزراعية او المواشي

اخر شي حصل انو زميلي في صافولا مهندس ومنتدب للعمل في الامانة مع المهندس/عادل فقيه, وكنت كلمتو على موضوعي وقدمت خطاب للامين اشرحلو فيه الوضع والامين تفاعل مع الموضوع وطلب توضيح من الزلمة اللي وقفلي اوراقي في صافولا فالسيد لمن شاف الخطاب قفل على الموضوع نهائيا ورد على الامين بانو القسم اللي كنت مقدم عليه(مايحتاج موظفين)لانهم مكتفين!!!سبحان الله يعني انا رحت من راسي قدمت واختبرت. المهم بعد كده كلموني على وظيفة في مصنع البلاستيك حقهم في قسم المساندة والدعم الفني الختص بالكمبيوتر فوافقت ورحت عملت مقابلة شخصية مرة عاشرة وانبسطوا مني الجماعة(كالعادة) بس طلبوا شوية وقت علشان يراجعوا نتيجة الاختبار اللي اختبرتوا من اول وقالوا ان شاء الله اذا جاتنا النتيجة نكلمك علشان توقع وتبدأ, المهم غابوا اسبوع,اتنين مافي خبر ولا اتصال وبعد الاسبوع التاني جاني اتصال من صافولا واحد بيسألني:انت اختبرت انجليزي؟؟؟؟

طبعا ياروح مامتك اختبرت

طيب شكرا!!!وحنرجع نكلمك

طبعا وعليها وانا لمن شفت الوضع زي كده اديتهم أكبر أشكل وقلت يمكن ربنا مو كاتبلي اشتغل معاهم.ا

بعد كده بفترة كلمني زميلي المهندس اللي شغال مع الامين وقالي انو الامين يبغاني اشتغل معاهم في الامانة(صافولا وانتداب على الامانة) فسألني عن رأيي فانا ابديت موافقة مبدئية فطلب مني اروح لمدير الموارد البشرية في صافولا علشان يديني المميزات واذا وافقت اوقع وابدأ معاهم.رحت وقابلني مدير الموارد بعد ما لطعني 10 دقايق وطبعا هو قابلني قبلها عشرطعش مرة وحفظ وجهي واسمي ورقم بطاقتي ومقاس فنيلتي الداخلية :)المهم وبدأ يتكلم وياريتو ما اتكلم

بدأ يديني العرض الماسي اللي مش ممكن افوتو:

الصراحة العرض أبدا أبدا أبدا ما يليق بواحد متخرج بكالوريوس حاسب الي وعندو خبرة سنة. مو بطارة او تكبر او غباء بس من جد هو اللي كان بيستهبل

طبعا بعد ماسبتو يخلص كلامو قلتله اديني الكلام دا مطبوع علشان افكر فيه براحتي

طبعا لكم الله راح الاخ يطبع الورقة وغاب 20 دقيقة بالظبط

20دقيقة علشان يطبع ورقة وحده ودا كلو وانا منتظر وملطوع

بعد كده شرف الاخ واعطاني الورقة ومشيت من عندهم

بعدين لمن قعدت اقرى الورقة اكتشفت انو كاتب اسمي غلط مرتين

وفي كل مرة كاتب اسم بتهجئة خطأ

وبعدين مرة كاتب السيد وتحتها على طول كاتبلي السيدة قوشماق!!!!!والله عيييييييييييييييب

على كل اظن الامور بعد كده مايبغالها كلام

اما بالنسبة لموضوع البعثة

فالأمور الى الان ماشية في هادا الاتجاه بكل سهولة والحمدلله

والظاهر انو هو دا الخيار الوحيد والمتاح

مكره اخاك لا بطل

الله المستعان

كان هادا الموجز والان مع التفاصيل :)ا

Advertisements

3 thoughts on “خبر عاجل

  1. السلام عليكم اخي
    حياك
    انا كنت بدور في قوقل عن شركة صافولا لأنهم دوبهم متصلين عليا على وظيفة
    فقلت خليني اطقطق واشوف سالفة صافولا والحمدلله لقيت مذكرتك هذه ، عجبتني كتير
    لأني ابغى اسألك عن الشركة دي
    شوف يا اخي العزيز دوبهم متصلين عليا وكلمتني وحدة بالانجلش ، وانا بصراحة في الانجيزي مشي حالك بس قدرت ارد عليها بالانجليزي جمليتن بسيطة ههههههه ، المهم قلتلها لازم تتكلمي انجليزي ؟؟؟ قالت : ايه لازم، وخربطت كم كلمتين بالانجليزي ما فهمت بصراحة بس فهمت المقصد اجمالا ، قالتلي انت كيف بالانجليزي ؟؟ قلت لها : يعني مو مرة ، قالت اجل متأسفين احنا نبغى وحدة تعرف انجليزي ، وشكرا ، قلت لها : شكرا ، ومع السلامة هههههههه
    تصدق اني زعلت شوية ، لأن صافولامن زمااااااااااااااااااااااااااان مقدمة عليهم من قبل 6 سنوات تقريبا ودوبهم اتصلوا عليا وطيرتهم ، بعدها بطقطق على النت وحصلت مذكرتك الحلوة هادي ، فحبيت اسألك ،، هل طيرت فرصة العمر من قدامي بسبب الانجليزي و لا لأ ؟؟ بالعربي صافولا يستاهلوا اني اتحسف عليهم ولا لأ ؟؟
    انتظر ردك على ايميلي اللي كاتبته في خانة البريد الالكتروني وشكرا لك اخي ، وسجلني من المتابعين لك ،، سلامو

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s