وا سعودتاه

شباب انا لازم اتكلم عن موضوع جدا مهم وجدا مضايقني وجدا قارفني في حياتي الا وهو(السعودة)ا

انا مشكلتي مع السعودة مشكلة

الناس كلها بتنادي بالسعودة

وزير العمل يجبر الشركات على سعودة وظائفها

الشركات تدعي تطبيق السعودة

وفجأة

تكتشف انك عايش في عالم وهمي

عايش على التلفيق والتدليس

انا حكايتي حكاية

وتوجع القلب (قلبي انا).ا

انا خريج جامعة الملك عبدالعزيز-بكالوريوس حاسبات-دفعة2004

مريت بالمرحلة اللي لازم اي شاب مكتوب في بطاقتو سعودي انو يمر بيها

مرحلة المرمطة والعذاب في الحصول على وظيفة

كنت قبل سنة تقريبا قدمت على وظيفة في شركة صافولا

كلنا يعرف صافولا وسمعتها بين الشركات

المهم انو اللي كلمني على الوظيفة واحد من اصحابي شغال هناك جزاه الله خير ماقصر والوظيفة كانت في نفس القسم اللي هو شغال فيه

المهم قدمت اوراقي وشهاداتي وانتظرت

كم يوم وكلمني صاحبي دا قلي يبغوك تجي علشان يعملوا معاك مقابلة

رحت وقابلت المسئول عن القسم اللي راح اشتغل فيه وكان جدا مبسوط مني

بقي مقابلة مع الرئيس العام لهذا القسم

راجل سعودي في الاربعينات

دخلت عليه وعملت المقابلة

جاوبت على اسئلتو بكل صراحة وماكذبت او خبيت شي

خرجت من عندو على امل -وعلى اساس انهم راح يردوا علي بعد كم يوم

المهم بعد كم يوم صاحبي كلمني وقلي ترى الراجل-المدير العام- يبغى يجيب واحد اجنبي بدالك-ساقط عليا – وهو بيتحجج بانك ماعندك خبرة وماعندك رخصة ولا استمارة والكلام الفاضي دا

يعني بالعربي :طارت الوظيفة

وكلنا امرنا لله واحتسبنا اجرنا عند الله عسى ان يعوضني خير

بعد كم من شهر -بعد مراحل ومواقف من الاحباط المتكرر والمستمر في موضوع فيزا أمريكا وبعد ما اتوظفت في الجامعة بعقد مؤقت- كلمني تاني صاحبي الطيب دا ابن الطيبين وقلي عندك استعداد تجي تشتغل عندنا ؟عندنا وظيفة شاغرة في نفس القسم

تاااااااااااااني؟؟؟

طبعا انا تفائلت لانو قالي انو الراجل اللي وقف في طريقي اول مرة نقلوه لمكان تاني وجابوا مكانو واحد ابن حلال-على حد وصف صاحبي-فانا طبعا فكرت في الموضوع ووجدت انها فرصة مناسبة ومواتية لانو موضوع الفيزا معلق وعقدي مع الجامعة ممكن في اي لحظة يقولولي-بح اح-على رأي السيدة المحترمة هيفاء وهبي,ابديت موافقتي واعلمت صاحبي بكده قلي بس لازم تختبر الاختبار حقهم قلت ومالو احنا مابنخفش من حاقة.

دخلت الاختبار وكان اختبارا اليما بكل معنى الكلمة حسيت فيه انو دماغي انعصرت وكل الخلايا اللي كانت نايمة في سبات شتوي طويل من زمان بس الحمدلله طلعت النتيجة مطمئنة والحمدلله

المرحلة التانية كانت مقابلة شخصية مع مدير القسم الجديد-ابن الحلال- وبالفعل ما وفرت شي من مهارات مكتسبة من سنين مخزنة عندي وكان الرجل راضي تماما-على حسب وصف السيد المسئول عن القسم اللي مقدم عليه(ملاحظة:هو نفس الشخص اللي قابلني اول مرة وكان مبسوط جدا مني)وجاءت المرحلة التالتة

مقابلة مع المسئول عن الموارد البشرية لمجموعة صافولا !!!!!طبعا هادي كانت مقابلة سهلة نسبيا بالنسبة لي لان الرجل ماكان يهمو امور تقنية بقدر ماكان يدور عن الشخصية

خلصنا هادي المقابلة على احلى مايكون

طيب ايش بقي؟؟؟

بقي توقيع نائب الرئيس المسئول عن هادا القسم

طيب فينو؟

مسافر وحيرجع بعد يومين

طيب, انتظرنا وخلصت اليومين

رجعت سالت قالولي لسه

لسه

الموضوع تحت البحث والدراسة

لسه

المهم في النهاية اكتشفت-بطريقة ما- انو الاخ نائب الرئيس دا كان عندو موظف ارتيري او تشادي-كلو محصل بعضو-شغال معاه من اول في المكان اللي كان ماسكو من قبل والاخ حن لايام زمان وافتكر العيش والملح اللي بينهم

فقال :الغريب اولى من ابن البلد

طبعا الموضوع الى الان ماخلص ومازلت اجري وادور وراهم ابغى بس احد يرسيني على بر

لكن اكتشفت-واتاكدت- انو في نوعيات وعقليات عندنا في البلد لازم تتغير

لا بل لازم تتحرق باوسخ قاز

فين السعودة والشباب السعودي واحنا بندعم الشباب وووووووووو……………الخ

لكن ما اقول غير:حسبي الله ونعم الوكيل على كل من وقف في طريق شباب هادي البلد اللي يبغوا يشتغلوا ويبنوا نفسهم مو اكتر

والله مانبغى ناخد مناصبكم

ولا رواتبكم

ولا اي شي مما تملكون

بس ادونا الفرصة وساعدونا

عظم الله اجرنا

ورحم ميتنا

Advertisements

4 thoughts on “وا سعودتاه

  1. صدقت و أنا معاك أن هناك أناس “عششوا” في مناصبهم و التي لا يريدون تركها بأي شكل من الأشكال مما يجعل أسلوبهم في الإدارة القديم يستمر و لا ينقطع و لا يتماشاى مع ما نحن عليه من تطوير مهني و إداري و ما إلى ذلك

  2. تصدق اخوي

    انا الان عايش المرمطه على اكمل وجه

    انا خريج جامعة البترول والمعادن محاسبه شهر فبراير ولليوم ادور لي وطيفه

    وكنت ناوي على صافولا بسسسس من كلامك خفت وكرهتها

    ربي يوفقك ويرزقك كل خير

  3. التنبيهات: Ahmad Qushmaq’s Blog » Blog Archive » خبر عاجل

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s